“Bu gün əldə etdiyimiz büdcə gəlirlərinin yetmiş faizindən çoxu əmlak vergisinin üzərinə düşür”-bu fikriləri Belediyye.infoya  Nəsimi bələdiyyəsinin sədri Əziz Zeynalov deyib.

Bələdiyyə tərəfindən atılan addımlar sayəsində əmlak vergisinin həcmini 2019-cu illə müqayisədə dəfələrlə artımağa nail olmuşuq.

Sədr bildirib ki, son illərdə BAMS-ın ƏMDX məlumat sisteminə qoşulması, habelə SMS xidmətinin tətbiq edilməsi nəticə etibarı ilə bələdiyyənin əmlak vergisinin həcminə əsaslı şəkildə təsir edib.

Bələdiyyənin vergi xidməti ilin sonunadək  ötən illə müqayisədə 22 faizədək artımın olacağını nəzərdə tutur.

Ümumi büdcə gəlirlərinin səviyyəsini artırmağımız rayon ərazisində həyata keçirilən layihələrin həcminə də öz müsbət təsirini göstərib.

Sonda sədr vergi ödəyicilərinə müraciət etməyi də unutmayıb. 

Sədr qeyd edib ki, fiziki şəxsin mülkiyyətində olan mənzilə görə əmlak vergisi həmin əmlakın yerləşdiyi ərazinin bələdiyyəsi tərəfindən yaşayış sahələrinə münasibətdə əmlakın 30 kvadratmetrdən artıq olan hissəsinin hər kvadratmetrinə görə Vergi Məcəlləsində göstərilən əmlak vergisi dərəcələri ilə, onun tutduğu torpaq sahəsinin hər 100 kvadratmetrinə görə torpaq vergisi isə Vergi Məcəlləsində göstərilən torpaq vergisi dərəcələri ilə illik hesablanır.

Bələdiyyə olaraq hesablanmış əmlak və torpaq vergiləri barədə tədiyə bildirişləri hər il üçün illik olmaqla həmin ilin avqust ayının 1-dək fiziki şəxslərə çatdırılır. Ancaq qanunvericiliyə edilmiş dəyişikliyə görə, 2027-ci  ildən tədiyə bildirişləri onlayn şəkildə təqdim ediləcək. İndidən bələdiyyənin vergi xidməti bu prosesin icrasına start verib.

Sədr onu da əlavə edib ki, fiziki şəxslər hesablanmış əmlak və torpaq vergilərinin məbləğini bərabər hissələrlə avqustun 15-i və noyabrın 15-dək onlara təqdim edilmiş YVÖK-la  banklar, poçt rabitəsinin milli operatoru, habelə mövcud onlayn ödəmə vasitələrindən istifadə edilməklə yerli büdcəyə (bələdiyyə büdcəsinə) ödəməlidirlər.

Hesablanmış vergi məbləğləri Vergi Məcəlləsi ilə müəyyən edilmiş müddətdə ödənilmədikdə, ödəmə müddətindən sonrakı hər bir ötmüş gün üçün vergiödəyicisindən ödənilməmiş vergi məbləğinin 0,1 faizi məbləğində faiz tutulur. Müəyyən edilmiş faiz vergi ödənişlərinə münasibətdə bütün ötmüş müddətə, ancaq bir ildən çox olmamaq şərti ilə tətbiq edilir.

Vergi ödəyicilərimizə tövsiyə edirik ki, təqdim edilən tədiyə bildirişləri üzrə vergilərini vaxtında ödəsinlər ki, onlara əlavə faiz hesablanmasın. Əldə edilən vəsait sonda yenə də vergi ödəyicilərinin problemlərinin həlliniə yönəldilir.

.Belediyye.info